Veðurlagstíðindi
FELAGS TAK AT MINKA UM CO2-ÚTLÁTIÐ
Bjørt Samuelsen, løgtingskvinna
Veðurlagsráðstevnan COP15 í Keypmannahavn nærkast í stórum fetum. Skulu vit lúka krøvini, ið avloysarin fyri Kyoto-protokollina fer at seta fyri minking av CO2-útlátinum, eru krøvini til Føroyar gróthørð. Vit mugu minka okkara útlát við millum 30 og 40%. Hetta tí tað er vaksið við á leið 11% síðani 1990.
Tí er alneyðugt sum skjótast at fáa lagt eina politiska langtíðarætlan, ið hevur breiða politiska undirtøku. Realistisk mál mugu setast, og avgerðir takast um, hvussu málini skulu røkkast – stuttskygt og langskygt. Neyvar strategiir eru púra avgerandi, skulu vit hava nakran møguleika at røkka málunum.
Ein slík langtíðarætlan eigur at innihalda:
- Mál fyri minking av CO2-útláti stuttskygt og fram til 2020
- Hvussu útlátið skal minkast á landi og í fiskivinnuni á sjógvi
- Hvørji ítøkilig átøk skulu setast í verk alt fyri eitt og hvørji komandi árini
- Nágreiniliga tíðarætlan fyri átøkini
- Hvussu átøkini verða knýtt at vinnumenning
- Hvørji búskaparátøk - tvs møguligar avgjalds- og stuðulsskipanir ætlanin er at fremja til tess at - minka um CO2-útlát
Stundin er komin at finna konsensus um, hvør rætta leiðin er at ganga. Nógv má leggjast fyri beinanvegin, skulu vit hava eina skjóta og dygdargóða menning av varandi orkukeldum.
Viðkomandi heimasíður
